தமிழக பாஜக’வின் அடுத்த தலைவர் யார்?

நடந்து முடிந்த மக்களவை தேர்தலை அடுத்து தேசிய அளவிலும் தமிழகத்திலும் அரசியல் கட்சிகள், தங்களுடைய கட்சியின் உட்கட்டமைப்பில் கவனம் செலுத்த தொடங்கி உள்ளது. ராகுல் காந்தி, தன்னுடைய காங்கிரஸ் கட்சியின் தலைவர் பதவியில் இருந்து விலகியது, நாங்கள் எப்போதும் வாரிசு அரசியலை ஊக்குவிப்போம் என திமுக’வில் உதயநிதிக்கு புதிய பதவி, அதிமுக’வில் நீடிக்க போவது இரட்டை தலைமை என்றாலும், ஒற்றை தலைமை என்று சொல்லிக்கொள்வது, அமமுக முக்கிய நிர்வாகிகள் மாற்றம், என அரசியல் கட்சிகள் அனைத்துமே புதிய மாற்றத்தை சந்தித்து வருகின்றன.

இப்படிப்பட்ட இந்த மாற்றத்திற்கான பட்டியலில், தமிழகத்தில் அதிக விமர்சனத்திற்கு உள்ளாகிய கட்சியான பாஜக’வும் இணைய உள்ளது என்பது தான் பரவலாக பேசப்பட்ட தகவல், அதுவும் தற்போது உண்மையாகும் சூழல் ஏற்பட்டுள்ளது. தமிழக பாரதிய ஜனதா கட்சியின் மாநில தலைவர் பதவிக்கு விரைவில் தேர்தல் வர இருக்கிறது. தற்போது தலைவராக இருக்கும் தமிழிசையின் பதவி காலம் சில மாதங்களில் முடிய இருப்பதால் தமிழக பாஜகவின் புதிய தலைவர் யார் என்று அக்கட்சியின் உள்ளேயும் அரசியல் வட்டாரத்திலும் பரவலாக விவாதிக்க பட்டு வருகிறது.

கடந்த ஐந்தரை வருடங்களாக தமிழக பாஜக’வின் தலைவராக இருந்து வருபவர் தமிழிசை சௌந்தரராஜன். நடந்து முடிந்த மக்களவை தேர்தலில், மற்ற மாநிலங்களில் பாஜக மிக பெரிய வெற்றியை பெற்று இருந்தாலும் தமிழகத்தில் அக்கட்சி ஒரு இடம் கூட வெற்றி பெற முடியாமல் தோல்வியை சந்தித்தது. தோல்விக்கான காரணங்களை ஆராய்ந்த மத்திய பாஜக தமிழகத்தில் அக்கட்சியை வளர்ப்பதற்கான திட்டங்களை வகுத்துள்ளது. கட்சியின் உள்கட்டமைப்பை வலுபடுத்தும் முதல் நடவடிக்கையாக தமிழ்நாட்டிற்கு ஒரு புதிய மாநில தலைவர் ஒருவரை நியமிக்க உள்ளது.

இது குறித்து தமிழக பாஜக நிலவரங்களை நன்கு அறிந்த கட்சி நிர்வாகி ஒருவரிடம் பேசிய போது, அவர் தெரிவித்ததாவது, “மற்ற மாநிலங்களை விட தமிழக அரசியல் நிலவரம் என்பது வித்தியாசமானது. தமிழக பாஜக தலைவர் பதவி என்பது ஒரு முள்கிரீடம் போன்றது என்பதை மத்தியில் ஆளும் பாஜக தெளிவாகவே புரிந்து வைத்திருக்கிறது. மக்களவை தேர்தல் தோல்வியால் தொண்டர்கள் மத்தியில் உற்சாகம் இல்லாமல் காணப்படுகிறது. கட்சியை மீட்டு கொண்டு வர்றதோட, தொண்டர்கள் மத்தியில் நம்பிக்கையை ஏற்படுத்தி கட்சிக்கு புது ரத்தம் புகுத்த வேண்டிய அவசியம் உள்ளதால் ஒரு நல்ல தலைமையை தமிழகத்துக்கு அமைத்து கொடுக்க வேண்டுமென மத்திய பாஜக விரும்புகிறது.

புதிய மாநில தலைவர் தேர்வுக்கு அப்புறம் கட்சிக்குள் பல்வேறு அதிரடி மற்றங்கள் இருக்கும். இனிமேல் தமிழகத்தில் பாஜக புது ரூட்ல பயணிக்கும்.” என்று சொல்லி முடித்தார் பாஜக’வின் அந்த நிர்வாகி.

பாஜக தலைவர்களை இந்தியாவில் உள்ள அனைத்து மாநிலங்களிலும் அவ்வப்போது எதிர்க்கட்சிகள் கலாய்த்து வருவது வழக்கம். அதிலும் தமிழகத்தில் பாஜக’வை எதிர் காட்சிகள் மற்றும் சமூக போராளிகள் சகட்டு மேனிக்கு விமர்சித்து வருவது வழக்கம். அதுவும் சமூக வலைத் தளங்களில் பாஜக’வுக்கு எதிராக கட்டுரைகளை எழுதுவது, மீம்ஸ் போட்டு கடுமையாக தாக்குவது என்பது மிக அதிகம். இத்தகைய தாக்குதல்கள் அனைத்தையும் தாங்கி கொண்டும், எதிர்த்து கொண்டும் இருக்கக்கூடியவர் தான் இந்த தமிழகத்தில் தலைவராக செயல்பட முடியும். இத்தனை எதிர்ப்புகளை மீறி, தமிழகத்தில் சாமர்த்தியமாக தாமரையை மலர வைக்கவேண்டும் என்று ஆளும் பாஜக ஸ்கெட்ச் போட்டுத்தான் பார்க்கிறது, ஆனால் அதற்கான சாத்தியக்கூறு மிகவும் குறைவாகவே உள்ளது. சரி சரி, ‘தமிழகத்தில் தாமரையை மலர வைப்பேன்’ என்று சவால் விடுவதற்கு, இந்த அகில இந்திய பாஜக தலைமை, யாரை தமிழகத்தின் தலைவராக நியமிக்க போகிறது என்பதை பொறுத்திருந்து தான் பார்க்கவேண்டும்.