ஆர்.கே.நகர் தொகுதி இடைத்தேர்தலில் தி.மு.க. வேட்பாளராக மருதுகணேஷ் போட்டியிடுகிறார். தி.மு.க. வேட்பாளருக்கு காங்கிரஸ், இந்திய கம்யூனிஸ்டு, மார்க் சிஸ்ட் கம்யூனிஸ்டு, இந்திய யூனியன் முஸ்லிம் லீக், விடுதலை சிறுத்தைகள் கட்சி, மனிதநேய மக்கள் கட்சி. தமிழ் மாநில தேசிய லீக். பார்வர்டு பிளாக், பெருந்தலைவர் மக்கள் கட்சி உள்ளிட்ட பல்வேறு கட்சிகள் ஆதரவு தெரிவித்துள்ளன.
மனுதாக்கல் செய்த நாள் முதல் மருதுகணேஷ் வீடு வீடாக சென்று மக்களை சந்தித்து வாக்கு சேகரித்து வருகிறார். புதுவண்ணாரப்பேட்டை பகுதியில் நேற்று ஓட்டு கேட்டபோது அவருடன் மாவட்டச் செயலாளர்கள் மாதவரம் சுதர்சனம், ஜெ.அன்பழகன், பி.கே.சேகர் பாபு மற்றும் விடுதலை சிறுத்தைகள் கட்சி, இந்திய யூனியன் முஸ்லிக் லீக் கட்சியினரும் உடன் சென்று ஓட்டு கேட்டனர்.
தி.மு.க. செயல் தலைவர் மு.க.ஸ்டாலின் வருகிற 7-ந் தேதி முதல் தீவிர பிரசாரத்தில் ஈடுபடுகிறார். அன்றைய தினம் ஆர்.கே. நகரில் வேட்பாளர் அறிமுக கூட்டம் நடக்கிறது. கூட்டணி கட்சியினருக்கு இதில் மருது கணேசை அறிமுகப்படுத்தி மு.க.ஸ்டாலின் பேசுகிறார்.
அதைத் தொடர்ந்து பிரசாரம் தீவிரம் அடைகிறது. மு.க.ஸ்டாலின் மற்றும் தலைவர்கள் வீதி வீதியாக சென்று பிரசாரத்தில் ஈடுபடுகிறார்கள்.
