உலகில் அதிக சோம்பேறிகளை கொண்ட நாடுகள் குறித்து ஸ்டான்போர்ட் பல்கலை., சார்பில் ஆய்வு ஒன்று நடத்தப்பட்டது. 46 நாடுகளைச் சேர்ந்த சுமார் 700,000 பேரிடம் இந்த ஆய்வு நடத்தப்பட்டுள்ளது.இப்பட்டியலில் இந்தியா 39 வது இடத்தில் உள்ளது. இந்தியாவில் மக்கள் சராசரியாக ஒரு நாளைக்கு 4297 அடி மட்டுமே நடக்கிறார்கள். அதிகபட்சமாக சீனர்கள் நாள் ஒன்றிற்கு 6880 அடிகள் நடக்கிறார்கள். மிக குறைந்த அளவாக இந்தோனேசிய மக்கள் 3513 அடிகள் மட்டுமே நடக்கிறார்கள். அமெரிக்கர்கள் 4774 அடிகள் நடக்கிறார்கள். மிக குறைவாக நடக்கும் மக்களை கொண்ட நாடுகளின் பட்டியலில் மலேசியா, சவுதி அரேபியா, இந்தோனேசியா ஆகிய நாடுகள் இடம்பெற்றுள்ளன.
ஆய்வு அறிக்கையின்படி, இந்தியாவில் ஆண்களை விட பெண்கள் மிக குறைந்த அடிகளே தினமும் நடக்கிறார்கள். ஆண்கள் ஒருநாளைக்கு சராசரியாக 4606 அடிகளும், பெண்கள் 3684 அடிகளும் நடக்கிறார்கள் என்பது தெரிய வந்துள்ளது. குறைவாக நடப்பதன் காரணமாக உடல் பருமன் பெண்களில் 232 சதவீதமும், ஆண்களில் 67 சதவீதமும் அதிகரித்துள்ளது. தினமும் 10,000 அடிகள் வரை நடந்தால் மட்டுமே கட்டுக்கோப்பான உடல் அமைப்பை பெற முடியும். டில்லி ஊட்டச்சத்து நிபுணர் ரித்திகா தெரிவித்துள்ளார். சீனர்களை விட இந்தியர்களே உடல் பருமன் அதிகம் கொண்டவர்களாக இருப்பதும் ஆய்வில் தெரிய வந்துள்ளது. இந்தியர்கள் குறைவாக நடப்பதும், தூரம் குறைவாக இருந்தாலும் அந்த இடத்திற்கு செல்வதற்கு கார் போன்ற வாகனங்களை அதிகம் பயன்படுத்துவதுமே இதற்கு காரணம் என கூறப்படுகிறது.
